Þjóðskjalasafn Íslands - Frettir - Manntalsvefur Þjóðskjalasafns Íslands opnaður



		Manntalsvefur Þjóðskjalasafns Íslands opnaður Á norræna skjaladeginum, laugardaginn 14. nóvember 2009, opnaði Katrín Jakobsdóttir, mennta- og menningarmálaráðherra, manntalsvef Þjóðskjalasafns Íslands, www.manntal.is. Katrín Jakobsdóttir mennta- og menningarmálaráðherra flytur ávarp. Katrín Jakobsdóttir mennta- og menningarmálaráðherra opnar manntalsvefinn. Þjóðskjalasafn Íslands fékk manntalið 1703 í Excel skrá frá Hagstofu Íslands um síðustu aldamót og var það birt á vef safnsins árið 2001. Um svipað leyti fékk safnið manntalið 1835 frá Friðriki Skúlasyni á tölvutæku formi, sem þó þurfti að breyta mikið áður en hægt yrði að birta það á vef safnsins. Sumrin 2003-2006 voru nokkrir háskólanemar ráðnir, með styrk frá Nýsköpunarsjóði stúdenta og í samstarfi við dr. Ólöfu Garðarsdóttur mannfjöldafræðing, til að skrá upplýsingar úr manntölum. Haustið 2007 ákvað ríkisstjórn Íslands að skera niður leyfilegan þorskafla. Til að efla atvinnusköpun í sjávarplássum á landsbyggðinni, til mótvægis við töpuð störf vegna niðurskurðarins, ákvað ríkisstjórnin að veita fé til flokkunar og skráningar á skjölum og skráningar upplýsinga úr manntölum. Undirbúningur hófst strax í nóvember 2007 og í byrjun febrúar árið eftir hófst skráning manntalsgagna í Vestmannaeyjum. Mánuði síðar hófst skráning á Sauðárkróki og Egilsstöðum. Á öllum þessum stöðum fór skráningin fram á héraðsskjalasöfnum undir verkstjórn héraðsskjalavarða. Í október 2008 bættist fyrirtækið Forsvar á Hvammstanga í hóp skráningaraðila. Þegar manntalsvefurinn var opnaður var búið að skrá með þessum hætti manntölin 1840, 1845, 1850, 1855, 1860, 1870 og 1890 og auk þess hluta manntalanna 1901, 1910 og 1920, alls um 542 þúsund færslur. Öll þessi manntöl, nema manntalið 1920, eru á manntalsvefnum auk manntalanna 1703 og 1835 sem áður voru aðgengileg á vef Þjóðskjalasafns. Manntalsvefur Þjóðskjalasafns Íslands er öllum opinn án nokkurrar gjaldtöku. Hann er einstakur í sinni röð vegna þess að hann veitir meiri upplýsingar um líf genginna kynslóða en finna má í öðrum manntalsgrunnum. Þar er m.a. hægt að fylgja persónum eftir frá einu manntali til annars og fylgjast með breytingum á búsetu og fjölskyldustærð. Þegar skráningu og undirbúningi manntalanna 1901, 1910 og 1920 lýkur verða tólf fullskráð manntöl aðgengileg á vefnum og á næstu misserum munu fleiri manntöl bætast í þann hóp.